Mjeku i njohur pneumolog Ardian Jorgji ka ngritur alarmin për përdorimin me doza të mëdha të antibiotikëve spitalorë, që në fazat e para të infektimit me Covid.
Kjo mund të sjellë pasoja afatgjata në shëndet.
“Shpeshherë Covidi bën një prezantim të fuqishëm me temperaturë të lartë, bën një sheshpushim dhe më pas kthehet në temperaturë të lartë, nuk duhet humbur vigjilenca në asnjë moment, prandaj këshilloj kontaktin me mjekin.
Sa i takon përdorimit të medikamenteve, fillimit dhe llojit të tyre, shikoj rëndom që përdoren një gamë e madhe antibiotikësh, ajo që është më tepër alarmuese, është përdorimi i antibiotikëve spitalor, qoftë edhe për fillimin e parë të mjekimit.
Nëse dështon ky lloj mjekimi i rëndë që jepet në fillim, çfarë do të bësh pastaj? Do të ketë ndikim afatgjatë edhe në trajtimin e sëmundjeve të tjera, duhet të kemi në vëmendje se Covidi do të mbarojë sot, do ta vazhdojë edhe vitin tjetër. Mendoj se është një fenomen kaq i shprehur në vendin tonë”, tha Jorgji.
Ndërkohë që mjeku tha se analizat në ditët e para të infektimit me Covid janë pothuajse të pavlefshme pasi nuk tregojnë gjendjen reale. Sipas tij kjo mund të sjellë në vonesa të nisjes së trajtimit të rasteve.
“Ka shpeshherë raste të vonuara të pacientëve, për shkak se iu dalin mirë analizat, në trajtimin e Covid ka shumë rëndësi ndjekja klinike. Vonimi i trajtimit çon në rëndimin e simptomave të sëmundjes, reagimi ndaj Covid është individual, nuk duhet të themi hë se mosha ime e kalon më lehtë”, përfundoi mjeku.
