Greqi- Bilanc tragjik nga aksidenti i trenave edhe për shtetasit shqiptarë me banim në Greqi.
Zjarrfikësit dhe personeli i ekipeve të shpëtimit kanë gjetur gjatë ditës së sotme dhjetëra trupa të tjera pa jetë, disa tërësisht të djegur, në llamarinat e shkrumbuara të vagonëve dhe numrit të viktimave nga aksidenti tragjik pas përplasjes së dy trenave në luginën e Tembit dy ditë më parë, që ka shkuar në 57 do t’i shtohen edhe 57 të tjerë që konsiderohen të humbur.
Mes viktimave ndodhen të paktën edhe pesë shtetas shqiptarë, pavarësisht se konfirmimi zyrtar për shumicën e tyre ende nuk është dhënë, pasi duhet të përfundohet identifikimi me anë të testit të ADN.
“Momenti më i vështirë është ky, ku në vend që të shpëtojmë jetë duhet të nxjerrim trupa. Nuk është diçka që na pëlqen, nuk është diçka që duam të bëjmë dhe është diçka që do të mbetet në kujtesën tonë përgjithmonë sado që përpiqemi ta harrojmë.“- shprehet Konstantinos Imanimidis, brigadat e shpëtimit të Kryqit të Kuq.
Midis 6 prej të plagosurve që vazhdojnë të trajtohen në Repartin e Mjekimit Intensiv të intubuar, është shtetasi shqiptar Roberto Dristi 25 vjeç që ka thyerje në shumë pjesë të trupit.
Ai po mjekohet në spitalin universitar të Larisës. Ndërsa 23 vjeçarja Anisa Liuri ka mbërritur dhe po trajtohet në spitalin e traumës Papanikolau në Selanik.
Në spitalin e Larisës kanë kryer testin e ADN të paktën 53 prindër apo të afërm të viktimave, ndërsa ende nuk ka një numër të saktë se sa persona janë përfshirë në aksidentin tragjik.
Mesditën e së enjtes para hetuesit dhe prokurorit ka deponuar 59 vjeçari përgjegjës i linjës hekurudhore në stacionin e Larisës i cili, pasi është arrestuar, ka pranuar një pjesë të fajit, pasi kishte urdhëruar mbrëmjen e së martës trenin e pasagjerëve të hynte në trasenë e gabuar.
Por avokati i tij mbrojtës ka vënë në dukje se nëse do të punonin edhe sistemet elektronike të sigurisë, do të ishte shmangur aksidenti fatal.
“I akuzuari ka marrë pjesën e tij të përgjegjësisë, në kuadër të përgjegjësisë që duhet të ketë dhe ka, por ajo që mund të themi tani për tani është se nuk duhet të fokusohemi te pema kur pas saj ka një pyll të tërë”, – tha ai.
Prokuroria ka kërkuar identifikimin e përgjegjësve të tragjedisë “kushdo që të jenë, kujtdo posti që i përkasin, ngado që vijnë”. Ajo kërkoi gjithashtu mbledhjen e shpejtë të provave dhe përfundimin e shpejtë të hetimeve.
Një proces hetimi ka nisur dje edhe Autoriteti Rregullativ i Hekurudhave i cili do të shqyrtojë zbatimin korrekt të Sistemeve të Menaxhimit të Sigurisë nga kompania shtetërore e hekurudhave OSE dhe kompania Hellenic Train.
Sindikatat greke të hekurudhave janë ankuar prej kohësh për standardet e dobëta të sigurisë që vënë në rrezik si pasagjerët ashtu edhe punonjësit e hekurudhave duke theksuar se vetëm në 60-70% të rrjetit funksionojnë sistemet e sigurisë, ndërsa aksidenti ndodhi në një prej të ashtuquajturave segmente të verbra.
Gjithashtu ato akuzojnë politikat e qeverive ndër vite për mënyrën e menaxhimit të fondeve, por edhe të vetë punonjësve, trajnimit të tyre dhe kushteve të punës.
